Anca quest’ann “Ul Tacuin de Macagn, Pin e Vedasca” l’ha fai ul pien! Gran sudisfaziun par tucc i amìs d’ul calendari e de la Scoeula Musicale de Macagn, c’ha l’ha fai stampaa.
Grandi lodi par i futugrafìi del sciur Davide Tomasina, che l’ha girà tucc i nos vall a la ricerca di cantùn pùsé bèi. Infatti l’ha voruu anca rapresentàa imagin de cappei e cappellett sperdü in di nos bòsch. L’è staja una pensada uriginal, perché sa po’ riscuprì loeùgh indua sa fermava i nos vecc a pregà. Inscì cumparìsan sui pagin di més la capeléta d’ul pan de Musgnan, quela di Alpin de Grej, ul Lazzaretto de Campagnan e un’altra vutiva in mezz ai bòsch. La prima pagina, invece, l’è dedicada al campanil de la gésa de Biegn e nel més da Genaar gh’è anca la gésa da S. Martin de Campagnan in notturna.
Còm’è usanza, ul tacuin l’è pién de pruerbi, filastrocc e canzun di temp andré. L’è propi un bellée, par i oeùcc e par ul coeur. Tanti amìs d’ul Tacuin han fai la racolta de tucc i trentatrì ediziùn e la raccòlta incoeu la vàr tanti danée.
Bòn ann a tùcc e sperém che l’ann noeuf sia un ann fortunaa par tüta la nossa gent! Ul Tacuin l’è vendùu in di negozi de Macagn e presso ul cartulée de Luin Cerutti&Pozzi.
P.S. Par quei c’han capì nagòtt, la prossima settimana pùblicarém la traduziun in lingua volgare!
Par la Banda ul Lino Bernascùn
(Foto di copertina © Davide Tomasina)
© Riproduzione riservata